O cado d'a espedera

ARAGONÉS

Autibaz de chuntos por l'Aragonés

Ixe moñaco d'a Expo 2008

Omenaches arredol d'o Ligallo de Fablans

Trezenas chornadas d'as Luengas d'Aragon de Nogará

O libret "Un nombre ta tú"

Chuntos por l'Aragonés, como ya sapez, ye a chuntadura de cuasi totas as asoziazions que en Aragón treballan por a lengua aragonesa e totas as suyas bariedaz.En ista plataforma bi ha chen d'as bals d'Echo y Ansó, Chazetania, Bielsa, Sobrarbe, bal de Tena u Benás e d'a tierra plana: d'o Semontano, Uesca e Zaragoza. 

L'intinzión ye fer o II Congreso d'a Luenga Aragonesa (o I estié l'añada 1987) iste estiu de 2006. Ta ixo, son fendo reunions en bels puestos d'Aragón (más que más en as bals d'o Pirineo), e recullindo refirmes d'empenta d'os Conzellos, d'o Gubierno d'Aragón,d'o Retor d'a Unibersidá de Zaragoza e de tota ra chen que quiera refirmar-lo (www.laragones.com)

A ixe moñaquer -pobrón- , que ye fiero como un totón, li han meso de mascota ta ra Esposizión Universal que se i-ferá l'añada 2008 en Zaragoza.

Malas que naxié, abié de meter-li nombre. E se fazié una botazión ta trigar-le-ne. Pero, mira-te tú qu'en ixa botazión (feita a trabiés d'o mobil, pero no de baldes), o nombre más trigato estié "gota" en aragonés, u siga CHISLA. E á la mai d'o totón, a soziedá EXPOAGUA, no li cuacó ixe nombre ta o moñaco e eslixió atro, que ye esclatero que no yera o más botau por a chen, pero, ixo sí, yera en castellano.

O zaguero mes d'Abiento se fazié en a bal de Xistau ,en o lugar de San Chuan de Plan, a chuntadura mensual de "Chuntos por l'Aragonés", e con ixa enchaquia o "Ligallo de Fablans" fazié os suyos "Omenaches Arredol" que estioron ta ra escritora en chistabín Nieus-Luzía Dueso Lascorz e ta as mullers d'o corro d'es bailes de San Chuan de Plan.

L'Asoziazión Nogará ha parato as Chornadas d'as Luengas d'Aragón, que fá cada añada (e ya en ban treze), ta o benién mes d'Abril en a Biblioteca d'Aragón d'a carrera Dr. Cerrada.

Ista añada, se ferá a presentazión d'os bideos d'o archibo audiovisual de l'aragonés que pertocan ta lo panticuto (charrato en Pandicosa, en a Bal de Tena); os bideos sobre a lengua aragonesa e temas d'autualidá de l'aragonés que fá Charrando TB; a presentación d'o zaguer numero d'a rebiesta de l'asoziazión Nogará "L'Espiello" e bella charradeta sobre as grafías en l'aragonés.

O Departamén de Educazión e Cultura d'o Gubierno d'Aragón a publicato o libret "Un nombre ta tú", que replega un endize de cuasi treszientos zincuanta nombres d'ombre e de muller con a suya bersión en castellano, catalán e aragonés, ta poder meter-lis-ne ta os ninóns rezién naxitos u ta facilitar o cambeo de nombre dende castellano ta l'aragonés ta qui quiera fer-lo.

www.mallacan.org

Mallacán ye una colla de mosicaires que, dende fa doze añadas, fan rock en aragonés . En iste cuatreno disco, PAIS ZIERZO, se sienten os nuevos aires d'a chen que ha dentrato en o grupo (uno d'ers, Jandro, que toca gaita, dulzaina, acurdión e teclaus, estié alumno d'o Instituto fa bellas añadas ) e as cantas están de muitas trazas : tradizionals, rockers, ska u reggae.